Hér má finna Útlánareglur Lífeyrissjóðs bankamanna. (samþykktar 23. janúar 2025)
Gildissvið - 1.gr.
Reglur þessar taka til útlána Lífeyrissjóðs bankamanna til sjóðfélaga. Sjóðurinn veitir sjóðfélögum lán gegn skuldabréfum tryggðum með veði í fasteign í þeim tilgangi að ávaxta eignir sjóðsins. Sjóðfélagalán eru fasteignaveðlán sem veitt eru á grundvelli laga um fasteignalán til neytenda nr. 118/2016.
Lánsréttur - 2.gr.
Sjóðfélagar sem eiga lögheimili á Íslandi, greiða iðgjöld til sjóðsins, og hafa greitt iðgjöld til sjóðsins í amk. 6 mánuði eða taka lífeyri hjá sjóðnum eiga kost á að sækja um lán hjá sjóðnum allt að kr. 70.000.000. Lágmarksfjárhæð láns er kr. 5.000.000. Við mat á lánsrétti skulu eldri lán dregin frá áunnum lánsrétti. Lán skulu vera verðtryggð að fullu samkvæmt breytingum á vísitölu neysluverðs sem Hagstofa Íslands auglýsir. Sjóðfélagar geta valið um að greiða lánin með jöfnum afborgunum auk verðtryggingar eða með jöfnum greiðslum afborgana og vaxta, auk verðtryggingar. Lánstími sjóðfélagalána er 5 til 40 ár.
Veðtrygging - 3.gr.
Lán er einungis veitt gegn veði í fullgerðu íbúðarhúsnæði. Íbúðarhúsnæðið skal vera í eigu lántakandans eða maka eða sambúðaraðila. Ekki er tekið veð í íbúðarhúsnæði annarra aðila. Ef eignin er sameign hjóna eða sambúðaraðila skulu báðir aðilar undirrita lánsumsókn og veðskuldabréf sem lántakendur. Leyfð eru önnur lán á undan láni frá sjóðnum, en hvorki fjárnám né lögtök. Lán sjóðsins ásamt öðrum lánum á undan í veðröð, má við lánveitingu ekki fara fram úr 70% af kaupverði eða matsverði, hvort af þessu er lægra enda sé veðhlutfall ekki hærra en 100% af brunabótamati húsnæðis að viðbættu lóðarmati. Ef veðhlutfall er umfram 65% er almennt gerð krafa um 1. veðrétt. Heimilt er að veita undantekningu frá framangreindri kröfu um 1. veðrétt ef lánsfjárhæð frá öðrum lánveitanda er innan við 10% af verðmæti fasteignar.
Sjóðurinn má hverju sinni láta matsmann sinn meta fasteign, telji hann ástæðu til þess. Mat skal framkvæmt á kostnað umsækjanda.
Ef sjóðurinn telur þörf á frekari upplýsingum um fasteign, er honum jafnframt heimilt að krefjast fyllri gagna, áður en til lánveitingar kemur.
Við mat á veðhæfni húsnæðis skal uppreikna áhvílandi lán í erlendum gjaldmiðlum með stuðlinum 1,3 eftir umreikning í íslenskar krónur.
Ekki er veitt lán gegn veði í ósamþykktu íbúðarhúsnæði né íbúðarhúsnæði sem fellur undir félagslega íbúðakerfið. Að jafnaði eru ekki veitt lán til einstaklinga með veði í fleiri en tveimur fasteignum. Ekki er lánað vegna fasteigna sem nýttar eru í atvinnuskyni.
Mat á greiðslugetu og lánshæfi - 4.gr.
Framkvæma skal mat á greiðslugetu og lánshæfi umsækjanda og maka hans eða sambúðaraðila, ef eignin sem veðsett verður er sameign beggja aðila. Skal miða við að tekjur í íslenskum krónum standi undir greiðslubyrði láns og er ekki tekið mið af leigutekjum við greiðslumat. Fylgigögn, sem liggja til grundvallar greiðslumati, skulu afhent sjóðnum og varðveitt í 5 ár.
Sjóðnum er ávallt heimilt að hafna umsókn um lán eða takmarka lánsfjárhæð ef greiðslugeta eða lánshæfi er talið ófullnægjandi. Skal almennt miðað við þau mörk að niðurstaða greiðslumats sé jákvæð og lánshæfismat samkvæmt CreditInfo sé B1 eða hærra.
Lánsumsókn - 5.gr.
Lánsumsókn skal skilað á eyðublaði sem sjóðurinn býður hverju sinni og það undirritað af sjóðfélaga og maka eða sambúðaraðila ef veðið sem á að tryggja lánið er í sameign þeirra.. Sjóðnum er heimilt að leita staðfestingar á gögnum sem lögð eru fram með umsókn.
Ásamt umsókn skal skila veðbókarvottorði, staðfestingu á brunabótamati og staðfestingu á stöðu áhvílandi lána á eigninni t.d. í formi nýjustu afborganakvittana eða greiðslutilkynninga frá viðkomandi stofnun.
Uppgreiðsla - 6.gr.
Lántakanda er heimilt að greiða lán sitt upp hvenær sem er á lánstímanum, ef hann óskar þess, án sérstakrar þóknunar.
Lántökukostnaður og innheimtukostnaður - 7.gr.
Lántökugjald er föst krónutala samkvæmt ákvörðun stjórnar hverju sinni og er dregið frá andvirði lánsins við útborgun. Tilkynnt skal um breytingar á lántökugjaldi með 30 daga fyrirvara að jafnaði á heimasíðu sjóðsins sem og með öðrum hætti sem uppfyllir ákvæði 13. gr. laga nr. 33/2013.
Önnur gjöld, svo sem vegna innheimtu og skjalagerðar greiðast samkvæmt gjaldskrá banka
Um ákvörðun vaxta - 8.gr.
Vextir sjóðfélagalána eru fastir út lánstímann en stjórn sjóðsins tekur ákvörðun um fasta vexti á hverjum tíma.
Gildistaka - 9.gr.
Reglur þessar öðlast þegar gildi. Koma þær í stað útlánareglna frá 23. nóvember 2023.